مهمّة زيزي هي دعوة أهل الأرض من البشر للتعمّق التعمّق التعمّق التعمّق التعمّق فكري شو أوّل شي بتشوفه العين؟ بلوزة، أعمق شو؟ تي شيرت. أعمق شو؟ فانيلا. أعمق؟ سوتيان. أعمق؟ نمش. أعمق؟ جلد. نبض. دم. حرارة. بكتيريا. ذكريات. ترومات. أحلام. جوع. أعمق أعمق؟ غبرة. هل لمستي غبرة الدودة هل شميتي غبرة ورقة الشجر ورملة الصحرا هل أكلتي برادات الغيمة وتغريدة العصفور وذرات الأكسجين هل لمستي سواد المجهول؟ بناء على توصيات غولات الكواكب وتنّينات شجر النجوم، زيزي حاملة معاها سؤال. لتسمعي السؤال، لتفهمي السؤال، لتاكلي السؤال، زيزي بدها ايّاكي تاخدي خطوة ابتعادا عن التشويش، تخفيف الضجّة، وممارسة التمعّن والتآلف مع الصفنة من أجل التعمّق.
زيزي بدهايّاكي تاخدي نفس.
خدي نفس
زيزي بتسألك شو هو ريزون ديتريك؟
شو يعني ريزون ديتر؟ هو سبب وجودِك. معنى كينونتك. هدفك. سببك. مهمتك. الزيزي اللي فيكي. مارسي تمارين التبربغند والتفلسف والعضعضة، فلتي نفسك للغوص والتلغوص والتشابك والتطارح والتلاخم. تعمّقي بكل شي، وتعمّقي بولا شي.
وهادا السؤال رفيقِك طول المدرسة، هو ريشة دغدغة وحش التفلسف اللي جواكِ، هو الصفحة هو الريشة هو الحبر. هو الكلسون اللي ما بتغيريه. زيزي بتدعوكي يكون هادا السؤال دايما معك من الصبح لليل. هادا هو السؤال اللي في بطن كل الأسئلة التانية. كل يوم بتغوصي أكتر.
شو هوّ الريزون ديتر تبعولك؟ تمرين الكتابة: في نصف ساعة أكتبي ما لا يقل عن صفحة مسودّتك الأولى جوابا على هادا السؤال.
